Connect with us

കവിത

ദിവസം, തിരക്കേറിയ ഒരു റോഡ് മാത്രമാകുന്നു

Published

on

സുജ എം ആർ

വര_ സാജോ പനയംകോട്

കുറച്ചേറെ ദൂരം പോകാനുണ്ടായിരുന്നു..
നഗരത്തിരക്കിലൂടെ,
ഒട്ടു ധൃതിയിൽ
പാതയോരത്തു കൂടെ,
വശം ചേർന്നു നടക്കുന്നു ഞാൻ..

കൊഴുപ്പടിഞ്ഞ ഞരമ്പുകളിൽ
രക്തം കട്ട പിടിച്ച പോൽ,
പലവിധ വാഹന സഞ്ചയം
അവിടവിടെ
കുടുങ്ങിക്കിടക്കുന്നു,
കഷ്ടം തന്നെ!!!

പാത മുറിച്ച് കടക്കുന്നേരം ചീറിയടുത്ത ബൈക്കനൊരുവൻ,
എന്റെ കയ്യിലിരുന്ന ഫോണും
തട്ടിത്തെറിപ്പിച്ച്,
നീളത്തിൽ ഹോണടിച്ച്,
തിരിഞ്ഞ് നോക്കി,
അവന്റെ,
വഴിയിൽ കയറിയ ദരിദ്രവാസിയെന്നെന്നെ,
നിർലോഭം പുച്ഛിച്ചിട്ട്,
അവന്റമ്മേടെ
വായുഗുളികക്കായി
നിർലജ്ജം യാത്രയാവുന്നു..

വഴിയിൽ കിടന്ന
ഫോണെടുത്ത്,
തൽക്കാലം രക്ഷപ്പെട്ടെന്നോർത്ത്, വായുഗുളികക്ക് പോയവൻെറ
മുൻതലമുറകളേയും,
പിൻതലമുറകളേയും,
അത്യുന്നത സ്നേഹത്തോടെയും, ആർദ്രതയോടെയും, സ്മരിച്ചും മഹത്വപ്പെടുത്തിയും,
കാൽനടക്കാരന്റെ,
പൊതുനിരത്തിലെ, അവകാശരാഹിത്യത്തിൽ
ഖേദിച്ചും, പ്രതിഷേധിച്ചും,
മനസ്സിനകത്തേക്ക് രണ്ട് മുദ്രാവാക്യവും,
പുറത്തേക്ക്
കാത് പുകയുന്ന
നാലഞ്ച് മഹദ് വചനങ്ങളും (കൊടുങ്ങല്ലൂർ ഭരണിക്കൊക്കെ നിർലോഭം പാടിക്കേൾക്കുന്ന അതേ വചനങ്ങൾ) വിക്ഷേപിച്ച്,
അപ്പുറത്തെ പീടികക്ക് മുന്നിൽ, നേരത്തെ ഉപേക്ഷിച്ച് പോയ
സ്വന്തം ബൈക്കിൽ
പൊടിയും തട്ടിത്തുടച്ച്
വലിഞ്ഞ് കയറിയിരിക്കുന്നു ഞാൻ..

റോഡിലേക്കെടുത്ത്,
നൂറേ നൂറിൽ പറപ്പിക്കാൻ ഒരുങ്ങുമ്പോൾ,
റോഡും മുറിച്ച്,
മുന്നിലേക്ക്
വന്ന് കയറുന്നൂ മന്ദം മന്ദം,
ഏതോ കുറേ അലവലാതികൾ
നാശം!!

താളത്തിൽ ഒന്ന്
വട്ടം ചവിട്ടി വരുമ്പോഴാണ്…

ആരാടാ??
ഇതിനെയൊക്കെ
കുറ്റീം പറിച്ച്
റോട്ടിലേക്കിറക്കി വിടുന്നത്?
റോട്ടുനികുതി കൊടുക്കുന്ന വാഹനൻമാർക്ക്
ഈ റോട്ടിലും നാട്ടിലും
ഒരു വിലയുമില്ലേ??
അവന്റമ്മേടെ..
നാ….ശം!!
പോയിട്ടെന്തൊക്കെ
പണിയുള്ളതാണ്..
ഹൊ!!!

ഇന്നത്തെയൊരു ദിവസം!!!
ഇന്നത്തെ ദിവസം,
മൊത്തം മൂഡും പോയി!!
പൊളിറ്റിക്കൽ കറക്റ്റ്നസ്
ഇല്ലാത്ത ലോകമേ..
ഞാൻ, അങ്ങ്
സ്വർഗരാജ്യത്ത് ജനിക്കേണ്ടവനല്ലായിരുന്നോ??
എന്തിനായിരുന്നു ഇതൊക്കെ??

littnow.com

Littnow ലേക്ക് രചനകൾ അയക്കുമ്പോൾ വാട്സാപ് നമ്പർ , ഫോട്ടോ കൂടി ചേർക്കുക.

littnowmagazine@gmail.com

കവിത

അറിയാൻ വൈകിയ ചിലതുകൾ

Published

on

ഷിൻസി രജിത്

ചില വാക്കിനു മറവിൽ
നൂറായിരംചതികൾ
ഒളിഞ്ഞിരിക്കുമ്പോൾ
നേര്…. നോവ് പിടിച്ച്
പൊള്ളയായ പുകമറയ്ക്കുള്ളിലിരുന്ന്
ഊർദ്ധൻ വലിക്കുന്നു.
ചില വാക്കുകൾ ചിതറിയോടി
എവിടെയെങ്കിലുമൊക്കെ
പറ്റി പിടിച്ചിരുന്നു
മോക്ഷത്തിന് ആഗ്രഹിക്കുമ്പോൾ
മൗനം കൊണ്ട് മൂടിയ വ്യാഖ്യാനങ്ങളത്രയും അർത്ഥ ബോധമില്ലാതെ
തെറ്റിയും തെറിച്ചും
വാരി വിതറപ്പെടുന്നു
ആലയിൽ മൂർച്ച കൂട്ടാനിനി
വാക്കുകളും വരികളും
ബാക്കിയാവുന്നില്ല
നേരുകൾക്കിനി മുഖംമൂടിയില്ലാതെ സ്വതന്ത്രരായിരിക്കാം.

ലിറ്റ് നൗ വിൽ പ്രസിദ്ധീകരിക്കുന്ന രചനകളുടെ പൂർണ്ണ ഉത്തവാദിത്വം എഴുത്തുകാർക്കു മാത്രമാണ്. രചനകൾക്കൊപ്പം വാട്സാപ്നമ്പരും ഫോട്ടോയും കൂടി അയയ്ക്കുക.
littnowmagazine@gmail.com
Continue Reading

കവിത

പെൺകവിയുടെ ആൺസുഹൃത്ത്

Published

on

penkaviyude

രാജീവ് മാധവൻ

അവർക്കിടയിൽ
തുറന്നു കിടന്ന
അവളുടെ കവിതയിൽ,
അവന്റെ കഥയില്ലായ്മകൾ
വട്ടമിട്ടു പറന്നു.

കൊത്തിയെടുത്ത്
കടിച്ചു കീറാൻ
പാകത്തിലൊരു
പൊള്ളയക്ഷരം പോലും
കിട്ടാതെയവനാദ്യം
അത്ഭുതപ്പെട്ടു,
പിന്നെ,
വലുതായസൂയപ്പെട്ടു.

അവളുടെ
വാക്കിന്നരികിലെ
മൂർച്ചകളിൽ,
അവനവനഹം
വല്ലാതെ
മുറിപ്പെട്ടു.

അലങ്കോലപ്പെട്ട
വടിവില്ലായ്മകൾ,
അവൻറെ
കാഴ്ചകളോടു
കലഹിച്ചു.

വരികൾക്കിടയിലെ
ആഴം കണ്ടവൻ,
അടിമുടി കിടുങ്ങി
വിറച്ചു.

അവൾ
നിർത്തിയ കുത്തിലും,
തുടർന്ന കോമയിലും,
അവനടപടലം നിലതെറ്റി.
അവന്റെ അതിജീവന
നാമ്പുകൾ,
അവളുടെ അർഹതയിൽ
ഞെരിഞ്ഞമർന്നു.
അവനൊളിച്ചു കൊത്താൻ
വിടർത്തിയ നിരൂഫണം,
അവളുടെ പുച്ഛത്തിൽ
പത്തിമടക്കി.

ഷായാദി പത്യ നാൾവഴികളി-
ൽപ്പരതിയലഞ്ഞൊ-
ടുക്കമൊരു കച്ചിത്തുരുമ്പി-
ലവൻ കെട്ടിപ്പിടിച്ചു.

അവൻ വിനയം കൊണ്ടു,
വിധേയത പൂണ്ടു.
പൗരുഷം പലതായ് മടക്കി-
ക്കീശയിൽത്തിരുകി.

അവളുടെ കവിതയെ
ചേർത്തു പിടിച്ചു,
തഴുകിത്തലോടി,
താത്വികാവലോകന-
ക്കാറ്റൂതി നിറച്ചു പൊട്ടിച്ചു.
വൈകാരികാപഗ്രഥന-
ക്കയറു വരിഞ്ഞുകെട്ടി,
സ്ത്രീപക്ഷ രാഷ്ട്രീയ
ശരിക്കൂട്ടിലടച്ചു.

എന്നിട്ടരിശം തീരാഞ്ഞവൻ;
അവളുടെ ഓരം ചേർന്നു
മുഷ്‌ടി ചുരുട്ടാനും,
അവൾക്കു വേണ്ടി
ശബ്ദമുയർത്താനും,
അവളുടെ കൊടിയേറ്റു
പിടിക്കാനും,
പിന്നെ…പ്പിന്നെ…
അവൾക്കു വേണ്ടി
കവിതയെഴുതാനും
തുടങ്ങി.

ലിറ്റ് നൗ വിൽ പ്രസിദ്ധീകരിക്കുന്ന രചനകളുടെ പൂർണ്ണ ഉത്തവാദിത്വം എഴുത്തുകാർക്കു മാത്രമാണ്. രചനകൾക്കൊപ്പം വാട്സാപ്നമ്പരും ഫോട്ടോയും കൂടി അയയ്ക്കുക.
littnowmagazine@gmail.com
Continue Reading

കവിത

ആത്മഹത്യക്കു മുൻപ്

Published

on

athmahathya

രേഷ്മ ജഗൻ

അന്നും വൈകുന്നേരങ്ങളിൽ ചൂടുള്ളൊരു കട്ടൻ ഊതികുടിച്ച് അയാൾക്കൊപ്പം നിങ്ങളിരുന്നിട്ടുണ്ടാവണം.

ജീവിതത്തിന്റെ കൊടുംവളവുകൾ കയറുമ്പോൾ വല്ലാതെ കിതച്ചുപോവന്നതിനെ കുറിച്ച് നിങ്ങളോടും അയാൾ പരാതിപ്പെട്ടു കാണണം.

ഒരു രാത്രി ഇരുട്ടി വെളുക്കുമ്പോൾ കൊഴിഞ്ഞു പോവുന്ന മനുഷ്യരെ കുറിച്ചയാൾ വേവലാതിപ്പെട്ടുകാണണം.

നിങ്ങളുടെ സ്ഥിരം ചർച്ചകളിൽ നിന്ന് വഴിമാറി,

ഇപ്പോഴും മക്കളോളം പക്വത എത്താത്ത ഭാര്യയെ കുറിച്ചൊരു കളിവാക്ക് പറഞ്ഞിരിക്കണം.
നിങ്ങൾ കേട്ടില്ലെങ്കിൽ പോലും മക്കളെ കുറിച്ച് പറഞ്ഞപ്പോൾ അയാളുടെ തൊണ്ട വല്ലാതിടറിയിരിക്കാം .

പതിവ് നേരം തെറ്റിയിട്ടും തിരികെ പോവാനൊരുങ്ങാത്തതെന്തേയെന്ന് നിങ്ങൾ സംശയിച്ചു കാണും.

ജീവിച്ചു മടുത്തുപോയെന്നു പറയാതെ പറഞ്ഞ എത്ര വാക്കുകളായാൾ നിങ്ങളുടെ ഹൃദയത്തിൽ കൊരുക്കാൻ ശ്രമിച്ചത്.

സാരമില്ലെടാ ഞാനില്ലേയെന്നൊരു വാക്കിനായിരിക്കണം
നേരമിരുളിയിട്ടും അയാൾ കാതോർത്തത്.

പുലർച്ചെ അയാളുടെ മരണ മറിയുമ്പോൾ അത്ഭുതപ്പെടേണ്ട!

ഹൃദയത്തിൽ നിന്നും ഹൃദയത്തിലേക്കുള്ള യാത്രയിലെവിടെയോ നമുക്ക് നമ്മെ നഷ്‌ടമാവുന്നുണ്ട്..

അല്ലെങ്കിൽ

മടങ്ങി പോവുക യാണെന്ന് തിരിച്ചറിയാൻ പാകത്തിന്
അയാൾ നിങ്ങളിൽ ചേർത്തു
വച്ച അടയാളങ്ങളെന്തെ
അറിയാതെപോയി.

Athmahathyakkurippu
ലിറ്റ് നൗ വിൽ പ്രസിദ്ധീകരിക്കുന്ന രചനകളുടെ പൂർണ്ണ ഉത്തവാദിത്വം എഴുത്തുകാർക്കു മാത്രമാണ്. രചനകൾക്കൊപ്പം വാട്സാപ്നമ്പരും ഫോട്ടോയും കൂടി അയയ്ക്കുക.
littnowmagazine@gmail.com
Continue Reading

Trending