Connect with us

കവിത

അന്നവേദം

Published

on

ജമാൽ കൊച്ചങ്ങാടി

കർഷക സമര ഐക്യദാർഢ്യ കവിത

അന്നദാതാവേ
അശിക്കുമോരോ വറ്റിലും
വറ്റാത്ത നിൻ സ്നേഹ
കുളിർമ്മയറിയുന്നേൻ

കുമ്പിളിൽ കോരും കഞ്ഞിക്കും
വസുമതിച്ചോറിനും
നിന്റെ കണ്ണീരുപ്പിന്റെ
ഒരേ രുചി

നീ വാരി വിതറിയ
പുന്നെല്ലിൻ നന്മണം
നിൽ കഴൽ പൂണ്ട
ചേറിൻ പാഴ് മണം

കടക്കെണിയിലൊടു –
ങ്ങിയോരച്‌ഛന്റെ
ചുടലയിൽ വേവും
മജ്‌ജതൻ രൂക്ഷ ഗന്ധം

നഗര ചത്വരത്തിലെ
പൊള്ളുന്ന ചൂടിലും
അസ്ഥി തുളയ്ക്കുന്ന
പാതിരാത്തണുപ്പിലും
ആകാശച്ചോട്ടിൽ
തെരുവു വീടാക്കി
പുകയുന്നു പൈതങ്ങൾ
പെണ്ണങ്ങൾ , വൃദ്ധരും

അന്നദാതാവേ
അറിയുന്നു നിൻ വ്യഥ
നോവുമാശങ്കയും രോഷവും
ചെറുത്തു നിൽപ്പിന്റെ വീര്യവും

പടരുകയാണിന്ത്യതൻ
ഹൃദയസിരാ
പടലങ്ങളിലൂടെ
രാഷ്ട്രേചേതനയാകെ

മാളം വിട്ടിറങ്ങിയ
പുതിയ വേതാളങ്ങൾ
വേട്ടയാടുന്നു വീണ്ടും
പുതിയ കുരുക്കുമായ്

തനിച്ചല്ല നീയൂട്ടും
ജനകോടികളുണ്ട് കൂടെ
അന്നമാണുയിരുടലൂർജ്ജങ്ങൾ
അന്നമാണ് വേദം
ജഠരാഗ്‌നിയേക്കാൾ
കൊടിയ നരകാഗ്‌നി _
യേതുണ്ട് പാരിൽ !

ഒക്ടോബർ 12
കർഷക രക്തസാക്ഷി ദിനം

Continue Reading
1 Comment

1 Comment

  1. രാജേന്ദ്ര പ്രസാദ്.

    October 12, 2021 at 7:05 pm

    കവിത വളരെ ഇഷ്ടമായി……

You must be logged in to post a comment Login

Leave a Reply

കവിത

മുൾവിചാരം

Published

on

ഉദയ പയ്യന്നൂര്‍

വീടുവരച്ചു തീർത്തൊരുവൾ
മുടിവാരിക്കെട്ടി
മുറ്റമടിക്കാൻ പോയി.

ഉച്ചയ്ക്ക് കൂട്ടാൻവച്ചു കഴിച്ച
മത്തിമുള്ളൊന്ന്
കാക്കകൊത്തി
നടുമുറ്റത്തിട്ടിട്ടുണ്ട്.

മത്തിവെട്ടുമ്പോൾ
ചത്ത മീനിന്റെ
തുറിച്ച കണ്ണു നോക്കി
ഒത്തിരിനേരമിരുന്നതാണ്.

നിലാവുള്ള രാത്രിയില്‍
ചന്ദ്രനും ചിലപ്പോളങ്ങനെയാണ്
പറയാനൊത്തിരി കരുതിവച്ച്
ഒന്നും പറയാതെ
നോക്കി നിൽക്കും.

മാറ്റമില്ലാതെ തുടരുന്ന
ഗതികെട്ട കുത്തിയിരിപ്പ് മടുത്ത്
കണ്ണുതുറന്നു സ്വപ്നം കാണുകയാവണം.

പറമ്പിലെ മൂലയില്‍
അടിച്ചു കൂട്ടിയ
പേരയിലകൾക്കൊപ്പം
മത്തിമുള്ളും എരിഞ്ഞമർന്നു.

അടുപ്പത്തു വച്ച അരി
വെന്തിരിക്കുമെന്ന്
വേവലാതിപ്പെട്ടു
തിടുക്കത്തിലോടി.

വേവ് കൂടിയാലും
കുറഞ്ഞാലും
രുചിയില്ലാതാവുന്ന
ജീവിതങ്ങള്‍.

ചിതയണച്ചിട്ടും
ബാക്കിയായൊരു
ഉശിരൻ മുള്ള്
ഉള്ളംകാലിലാഴ്ന്നപ്പോഴാണ്
വരച്ചു വച്ച വീടിന്
വാതിലില്ലെന്നോർത്തത്.

പതിവു തെറ്റിച്ച്
തുറന്നിട്ടൊരു വാതിലും
ജനാലയും
വരച്ചു ചേർത്തു.

മുറ്റത്തൊരു മത്തിമുള്ളും
മരക്കൊമ്പിലൊരു കാക്കയും
കാക്കയ്ക്ക്
തിളക്കമുള്ള കണ്ണുകളും.

littnowmagazine@gmail.com

Continue Reading

കവിത

അവസരവാദ കാഴ്ച്ചകൾ

Published

on

സതീഷ് കളത്തിൽ

മലയാളിയുടെ ലിംഗസമത്വം;

‘മണ്ണാൻ മജിസ്‌ട്രേറ്റായാലും’
മലർക്കുട ചൂടേണ്ടതില്ലെന്നു
മനസാ ധരിച്ച്; വെളുക്കെ ചിരിയ്ക്കും
മലയാളിക്കുംവേണം ലിംഗസമത്വം…!

മുലമാറാപ്പ്:

മറയില്ലാത്ത അടിയാത്തികളുടെ
മുഴുത്ത മാറിൽ കോർത്തുക്കിടന്ന
മടുക്കാത്ത തമ്പ്രാക്കളുടെ കൊഴുത്ത
മുരടൻ കണ്ണുകളെ കൊത്തിയിട്ട
മലയാളി വീരാംഗനകൾ കൽക്കുളത്ത്
മേൽശീല പരതിയിന്നു നടക്കുമ്പോൾ
‘മുലമാറാപ്പ്’ പുതിയ ആകാശം തേടുന്നു;
മുരടൻ തമ്പ്രാക്കൾ പൊട്ടിച്ചിരിക്കുന്നു..!

അതിജീവിത വേഷങ്ങൾ:

അഞ്ചാംപുരയിലെ കതകിനു മറവിലെ
അടുക്കളദോഷക്കാരികളിൽ ചിലർ
അരങ്ങ് തകർത്താട്ടം തുടരുന്നു;
ആ ‘സാധന’ മിന്ന് അതിജീവിതയാകുന്നു.
അറുപത്തഞ്ചിലൊരു നറുക്കാകാതിരിക്കാൻ
അഷ്ടമൂർത്തിയും അച്ചുതനും ശാമു രാമുവും
അരചനും ശുചീന്ദ്രത്ത് കൈമുക്കാനെത്തുന്നു;
അടുക്കളയിൽനിന്ന് അരങ്ങത്തേക്കെത്തിയ
ആട്ടക്കാരികൾ സാവിത്രീ വേഷമാടുന്നു;
അഭിനവ ജാതവേദന്മാർ തില്ലാന പാടുന്നു..!

littnow.com

ലിറ്റ് നൗ വിൽ പ്രസിദ്ധീകരിക്കുന്ന രചനകളുടെ പൂർണ്ണ ഉത്തവാദിത്വം എഴുത്തുകാർക്കു മാത്രമാണ്.
രചനകൾ അയക്കുമ്പോൾ ഒപ്പം വാട്സ്പ് നമ്പരും ഫോട്ടോയും അയക്കുക .

Continue Reading

കവിത

അവളെ പ്രണയിക്കരുത്

Published

on

രേഖ ആർ താങ്കൾ

കവിത തീണ്ടിയവളെ
ഒരിക്കലും പ്രണയിക്കരുത്
അവളുടെ രോമകൂപങ്ങളിൽ നിന്ന് പോലും
രക്തം പൊടിയുന്നുണ്ടാവും

പതഞ്ഞുയരുന്ന പ്രണയവീഞ്ഞ്
മൊത്തിക്കുടിച്ചുന്മാദിയാകുമ്പോഴും
അവൾ സ്വയമറിയാതെ ഉരുകും

പ്രണയത്തിലിറ്റുന്ന
തേൻമധുരം പോരെന്നവൾ
വിലപിച്ചു കൊണ്ടേയിരിക്കും

സ്വപ്നാകാശത്തിലലഞ്ഞു നടന്ന്
ഇരുണ്ടമേഘങ്ങളെ
നെഞ്ചേറ്റും

നിലാവായി പടർന്നുനിറയാൻ
വെളുത്തവാവുകൾ
കാത്തിരിക്കില്ല

നീ പോലുമറിയാതെ
നിന്റെ ഹൃദയതാളത്തിലവൾ
കവിതചമയ്ക്കും

ഉടഞ്ഞുപോയ വളപ്പൊട്ടുകൾ
ഉരുക്കിച്ചേർക്കാൻ
സ്നേഹച്ചൂടിനായി
വാശിപിടിക്കും

ഞെട്ടിയുണരുമ്പോൾ
പൊലിഞ്ഞുപോകുന്ന കിനാവുകളോർത്തവൾ
പനിച്ചു വിറയ്ക്കും

നീ കരയ്ക്ക് കയറുമ്പോഴും അവളുടെയുള്ളിൽ ഒരു കടൽതന്നെ അലയടിക്കുന്നുണ്ടാവും

മഴയും വെയിലും ഒന്നിച്ചറിഞ്ഞ്

കുറുക്കന്റെകല്യാണം കൂടാൻ കഴിയാതെ

സ്വപ്നം മയങ്ങുന്ന കണ്ണുകളെ
ഒരിക്കലും പ്രണയിക്കരുത്!

Continue Reading

Trending